մեր մասին

4Պլյուսը հայ կին լուսանկարիչների կոլեկտիվ է, որի նպատակն է խթանել վավերագրական լուսանկարչությունը Հայաստանում, ինչպես նաև քաջալերել կին լուսանկարիչներին ու կանանց՝ Հայաստանում և այլուր:

Մեր գործունեության հիմքում ընկած է ոչ միայն կին լուսանկարիչներին քաջալերելը, այլ առհասարակ կանանց՝ բարձրաձայնելով և լուսաբանելով նրանց խնդիրների մասին, ում իրավունքները ոտնահարվում են: Մեզանից յուրաքանչյուրը արդեն երկար ժամանակ վավերագրում է սոցիալական եւ մարդու իրավունքների ոտնահարման խնդիրները` արտացոլելով մշակութային առանձնահատկությունները:

4Պլյուսը նաև կազմակերպում է լուսանկարչական դասընթացներ, ցուցահանդեսներ և դասախոսություններ:

4Պլյուսը հիմնադրվել է 2012-ին: Ներկայումս 4Պլյուսի անդամներն են Անահիտ Հայրապետյանը, Նազիկ Արմենակյանը, Նելլի Շիշմանյանը և Փիրուզա Խալափյանը:

մեր թիմը

Նազիկ Արմենակյան

Նազիկ Արմենակյանը որպես ֆոտոլրագրող իր աշխատանքը սկսել է 2002-ին Արմենպրես լրատվական գործակալությունում: Այնուհետև աշխատել է Երևան և Ֆորում ամսագրերում, ArmeniaNow.com պարբերականում: 2004-ին Կովկասյան լրատվամիջոցների ինստիտուտի և World Press Photo–ի կազմակերպած մեկամյա դասընթացին մասնակցելուց հետո Նազիկը սկսել է աշխատել երկարաժամկետ վավերագրական նախագծերի վրա:

Նազիկը մի շարք տեղական և միջազգային մրցույթների հաղթող է: 2009-ին նա արժանացել է Գրան Պրի և առաջին մրցանակի «Մարդիկ ու դեմքեր» անվանակարգում Karl Bulla-ի միջազգային ֆոտո մրցույթում «Վերապրածներ» երկարաժամկետ նախագծի համար: 2011-ին Արմենակյանը «Մարդու իրավունքները լուսանկարչության մեջ» կրթաթոշակ է ստացել Մագնում հիմնադրամից և վավերագրական լուսանկարչության դրամաշնորհ Բաց Հասարակություն հիմնադրամից: Մասնակցել է մի շարք խմբակային ցուցահանդեսների Հայաստանում, Չինաստանում, ԱՄՆ-ում,  Հոնգ Կոնգում, Հնդկաստանում, Ռուսաստանում:

Նրա լուսանկարները տպագրվել են The New York Times Lens blog, Der Spiegel, Politiken, Eurasianet և մի շարք այլ միջազգային և տեղական  լրատվամիջոցներում:

Նազիկ Արմենակյանը 4Plus վավերագրական լուսանկարչության կենտրոնի համահիմնադիրներից է:

Անահիտ Հայրապետյան

Անահիտ Հայրապետյանը լուսանկարիչ է ու պոետ։ Ավարտել է Հայաստանի պետական ճարտարագիտական համալսարանի «Քոմփյութերային համակարգեր ու ինֆորմատիկա» բաժինը, Կովկասյան ինստիտուտի ֆոտոլրագրության բաժինը, ուսանել է ֆոտոլրագրություն Դանիայի մեդիայի ու լրագրության դպրոցում։

Անահիտ Հայրապետյանը արժանացել է մի շարք մրցանակների լուսանկարչության ու պոեզիայի համար։ Նրա աշխատանքները տպագրվել են մամուլում՝ Նյու Յորք Թայմս, Եվրասիանեթ, ԲիԲիՍի, Գարդիանս ու այլն։

Անահիտ Հայրապետյանը մասնակցել է բազում ցուցահանդեսների աշխահի տարբեր ծայրերում։ Տպագրել է բանաստեղծությունների երեք՝ «Բանաստեղծություններ», 2002թ., «Թաբու» 2005թ., «Սիրուն» 2015թ., ժողովածուներ, ինչպես նաեւ «Արքայադստրից ստրուկ» լուսանկարչական գիրքը՝ տպագրված ՖոտոԷվիդենսի կողմից, որը պատմում է Հայաստանում կանանց բռնությունների մասին։

Անահիտ Հայրապետյանը 4Plus վավերագրական լուսանկարչության կենտրոնի համահիմնադիրներից է:

Փիրուզա Խալափյան

Փիրուզա Խալափյանը լուսանկարչությամբ սկսել է զբաղվել Կովկասյան լրատվամիջոցների ինստիտուտի և World Press Photo–ի կազմակերպած մեկամյա դասընթացին մասնակցելուց հետո: Այնուհետեւ կրթությունը շարունակել է Երեւանի թատրոնի և կինոյի պետական ինստիտուտում` մասնագիտանալով վավերագրական ֆիլմերի ռեժիսուրայում: Որպես ֆոտո խմբագիր աշխատել է «Պատկեր» ֆոտո գործակալությունում և “National Geographic Traveler Armenia” ամսագրում: Որպես լուսանկարիչ համագործակցել է Medialab.am, chai-khana.org, ArmeniaNow.com  կայքերի հետ: Մասնակցել է Յուրի Կոզիրևի, Անդրեյ Պոլիկանովի, Պատրիք Սադերլենդի, Ադրիան Քելթերբորնի, Դագ Բլաշի անցկացրած դասընթացներին:

Ունեցել է անհատական եւ խմբակային ցուցահանդեսներ Հայաստանում, Վրաստանում, Ֆրանսիայում եւ մի շարք այլ երկրներում: 2008-2009 մասնակցել է Բրիտանական խորհորդի «Close to Home» «Ապրենք միասին» շրջիկ ցուցահանդեսին։ 2011 թվականին արժանացել է Բրիտանական խորհորդի «Նա/Նե» առաջին մրցանակին: 2013-ին ստացել է Բաց հասարակության հիմնադրամի կողմից ‘’Documentary Photography Production Grant’’ իսկ 2017-ին Արվեստ Հայաստան հիմնադրամի «Ֆինանսական աջակցություն արվեստի նախագծերին» դրամաշնորհները:

2016-ից  Փիրուզա Խալափյանը 4Plus վավերագրական լուսանկարչության կենտրոնի անդամ է, որի նպատակը Հայաստանում վավերագրական լուսանկարչության զարգացումն է և կանանց զորացումը լուսանկարչության միջոցով:

Նելլի Շիշմանյան

Նելլի Շիշմանյանը դոկումենտալ լուսանկարիչ է, ում մասնագիտական ուղին սկսվել է Կովկասյան ինստիտուտի աջակցությամբ կազմակերպված  World Press Photo–ի ֆոտոլրագրության մեկամյա սեմինարներից` Ռուբեն Մանգասարյանի ղեկավարությամբ։ Նելլին մասնակցել է դոկումենտալ լուսանկարչության և մուլտիմեդիայի վերաբերյալ միջազգային և տարածաշրջանային մի շարք նախագծերի, սեմինարների: Նրա աշխատանքները ցուցադրվել են ինչպես Հայաստանում, այնպես էլ` նրա սահմաններից դուրս: Ժամանակ առ ժամանակ համագործակցել է ArmeniaNow, «Հետք», «Չայ Խանա» պարբերականների հետ, նրա լուսանկարները հրապարակվել են Enter (World Press Photo), Newsweek Russia, «Огонёк», National Geographic Traveler (Armenia), Brownbook, Financial Times UK և այլ ամսագրերում։ 2012-ին Նելլին արժանացել է Հայաստանում Բրիտանական խորհրդի Նա/Նե մեդիա մրցանակաբաշխության առաջին մրցանակին։ Ներկայում MyAngle մուլտիմեդիա նախագծի հայաստանյան համակարգողն է։ Նելլին մասնագիտությամբ նաև երաժիշտ է. ղեկավարում է Ավետ Տերտերյանի անվան արվեստի դպրոցի երգչախումբ, որպես երգչուհի ընդգրկված է միջազգային համբավ ունեցող «Հովեր» պետական կամերային երգչախմբում:

2016-ից Նելլի Շիշմանյանը 4Plus վավերագրական լուսանկարչության կենտրոնի անդամ է, որի նպատակը Հայաստանում վավերագրական լուսանկարչության զարգացումն է և կանանց զորացումը լուսանկարչության միջոցով: