Տաթև Հակոբյան, Փիրուզա Խալափյան, Գայանե Հարությունյան
Սեպտեմբերի 27-ին Արցախում պատերազմական գործողություններ ծավալվեցին, որոնք շարունակվում են մինչ օրս։ Այս իրադարձությունների հետևանքով Երևան և մի շարք այլ բնակավայրեր տեղափոխված մեր ազգակիցներին հյուրընկալում են ընտանիքներ, կազմակերպություններ, հյուրանոցներ և այլն։
Հայաստանում և արտերկրում բնակվող հայերը, ինչպես նաև բազմաթիվ օտարերկրացիներ, անում են ամեն հնարավոր բան՝ պատերազմից տուժած մարդկանց օգնություն ցուցաբերելու համար։ Կացարաններ, հագուստ, սնունդ, դեղորայք, հանգանակություններ․ ՀՀ Սոցիալական ապահովության ծառայությունը և մի շարք այլ կառույցներ կամավորների օգնությամբ հոգում են պատերազմի հետևանքներից տուժած ընտանիքների կարիքները։
Երիտասարդ կամավորի ուղերձ-նամակը. «Թող որ բոլորի սերերը շուտ հետ գան»: Լուսանկարը` Գայանե Հարությունյան
Արաբկիր համայնքի զինկոմիսարիատ։ Հրաժեշտ։ Լուսանկարը՝ Տաթև Հակոբյան
Անահիտ Եղիազարյան, 20 տարեկան, Գյումրի քաղաքից։
Միշտ հնարավորություն չի եղել, որ աղջիկները դրսևորեն իրենց։ Ըստ իս, սա առաջին անգամն է, որ մենք կարող ենք մեր տղաների կողքին լինել։ Եթե աղջիկ ես, չի նշանակում, որ պիտի տանը հեզ սպասես։ Պատերազմի առաջին իսկ օրվանից որոշել եմ գալ ու վստահ էի, որ գալու եմ, ու եթե գնամ էնտեղ անգամ մի բաժակ ջուր տալու համար, պատրաստ եմ գնալ։ Ծնողներս կողմ են, մայրս նույնիսկ շատ է կողմ։ Ասում ա, որ հայրենասեր սերունդ ենք, ու որ մեզ ոչ մեկը չի կարող կանգնեցնել։ Նոր էլ, որ իմացավ՝ ստեղ եմ, մի պահ չհավատաց, հետո ասաց՝ դե լավ, ով կրնա վրեդ․․․ Լուսանկարը՝ Փիրուզա Խալափյան
«ՈՄԱ» դասընթացների համար նախատեսված զենքերի կաղապարվածքները։ Լուսանկարը՝ Տաթև Հակոբյան
Երևանի Կամերային պետական թատրոնի բակում մեկնարկեց «Օգնություն Արցախին» նախաձեռնությունը, որի շրջանակներում կամավորները հագուստ, դեղորայք և սննդամթերք են հավաքագրում՝ Արցախ ուղարկելու համար։ Լուսանկարը՝ Գայանե Հարությունյան
Կամավորների ջանքերով հավաքագրված օգնությունը բաշխվում է նաև պատերազմի հետևանքով Արցախից Երևան և այլ բնակավայրեր տեղափոխված ընտանիքներին: Այս ընտանիքները գրանցվում են Սոցիալական ապահովության ծառայության բազայում և տեղափոխվում կացարաններ։ Լուսանկարը՝ Գայանե Հարությունյան